ភ្នំពេញ: ថ្ងៃចន្ទ ទី០២ ខែសីហា ឆ្នាំ២០២១ រដ្ឋមន្ត្រីក្រសួងការបរទេស លោក ប្រាក់ សុខុន នឹងធ្វើជាសហប្រធានកិច្ចប្រជុំជាដៃគូរវាងមេគង្គ-អាមេរិក លើកទី២ នៅថ្ងៃទី០៣ ខែសីហា ជាមួយរដ្ឋមន្រ្តីការបរទេសអាមេរិក លោក អេនតូនី ប្លីនខេន។ កិច្ចប្រជុំតាមប្រព័ន្ធវីដេអូនេះ នឹងមានទទួលការចូលរួមពីរដ្ឋមន្ត្រីការបរទេសឡាវ មីយ៉ាន់ម៉ា ថៃ និងវៀតណាម ព្រមទាំងអគ្គលេខាធិការអាស៊ានផងដែរ។

កិច្ចប្រជុំនេះនឹងពិនិត្យមើលទៅលើវិវឌ្ឍភាពនៃកិច្ចសហប្រតិបត្តិការ ដែលធ្វើឡើងចាប់តាំងពីកិច្ចប្រជុំភាពជាដៃគូមេគង្គ-អាមេរិកលើកទី១ កាលពីខែកញ្ញាកន្លងទៅនេះ។ កិច្ចប្រជុំនេះក៏នឹងកំណត់ទិសដៅឆ្ពោះទៅមុខក្នុងបរិបទនៃជំងឺកូវីដ-១៩ ផងដែរ។

កិច្ចប្រជុំនេះបង្កើតឡើងចំពេលដែលភាពតានតឹងរវាងទីក្រុងភ្នំពេញ និងទីក្រុងវ៉ាស៊ីនតោនធ្លាក់ចុះ។ ចំពេលដែលសហរដ្ឋអាមេរិកផ្ដល់ជូនវ៉ាក់សាំងការពារជំងឺកូវីដ-១៩ ជាលើកដំបូងមកកាន់ប្រទេសកម្ពុជា នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល ព្រមទាំងប្រជាជនអាមេរិកសំរាប់អំណោយនេះ។ លោកបានចាត់ទុកសហរដ្ឋអាមេរិកជា “ប្រទេសមិត្តភាព” រួមជាមួយនឹងប្រទេសចិន ជប៉ុន និងអង់គ្លេស ដែលបានសន្យាបរិច្ចាគវ៉ាក់សាំងការពារជំងឺកូវីដ-១៩ ក៏ដូចជាប្រទេសដែលបានផ្តល់ជូនរួចកន្លងមក។

អ្នកការទូតនៃស្ថានទូតអាមេរិកបាននិយាយថា វ៉ាក់សាំងនេះបង្កើតឡើងមិនត្រឹមតែដើម្បីជាការពេញបំណងភាគីនោះទេ ប៉ុន្តែក៏ជាផ្នែកមួយដែលជម្រុញការគាំទ្រឥតឈប់ឈរទោកាន់ប្រជាជនកម្ពុជា។ វ៉ាក់សាំងដូសទីមួយរបស់ Johnson & Johnson ចំនួនជាង ៦សែនដូស បានមកដល់អាកាសយានដ្ឋានអន្តរជាតិភ្នំពេញ កាលពីព្រឹកថ្ងៃច័ន្ទនេះ៕